Manylion Cyswllt

Archifdy Sir Penfro
Y Castell
Hwlffordd
Sir Benfro
SA61 2EF
Ffôn: 01437 763707
Ebost: record.office@pembrokeshire.gov.uk
Gwefan: http://www.pembrokeshire.gov.uk/content.asp?nav=646&parent_ directory_id=646&language=CYM&pagetype=&keyword=
(chwiliwch am Archifdy Sir Penfro)
 

Ble ydym ni?

Mae Archifdy Sir Penfro wedi ei leoli yn yr hen garchar Tref a Sir, ar dir y Castell, yn edrych dros dref Hwlffordd.

Mae yna sawl ffordd o gyrraedd yr Archifdy. Dyma'r prif rai:

Tua'r de ar yr A40 o Abergwaun: dilynwch yr A40 tuag at ganol y dref. Cymerwch y drydedd ffordd oddi ar y gylchfan ger archfarchnad Morrison. Cymerwch y trydydd troad oddi ar y gylchfan nesaf (ger y garej Skoda). Cymerwch y ffordd gyntaf oddi ar y gylchfan (fach) nesaf yna trowch i'r chwith ar eich union i mewn i Stryd yr Eglwys. Bydd Eglwys San Martin ar y chwith. Parhewch ar eich ffordd i fyny Stryd yr Eglwys, sy'n arwain at Sgwâr y Frenhines (sgwâr bychan gyda cheir wedi parcio yn y canol). Ewch i mewn i Stryd y Castell ar ben uchaf y sgwâr (rhwng dwy res o dai). Mae'r gatiau i mewn i dir y Castell o'ch blaen. Gellir parcio ar y safle.

Edrychwch am arwyddion post brown ar gyfer y Castell, yr Archifdy a'r Amgueddfa ar hyd y ffordd. Mae'r tri ar yr un safle.

Tua'r gorllewin ar yr A40 o San Clêr a'r M4: cymerwch y troad cyntaf oddi ar y gylchfan gyntaf ar eich ffordd i mewn i Hwlffordd, ac ewch i'r lôn ar y dde pan fydd y ffordd yn rhannu. Cymerwch y pedwerydd troad oddi ar y gylchfan nesaf (bydd y County Hotel ar y chwith) ac ewch i'r lôn ar y chwith. Cymerwch y troad cyntaf oddi ar y gylchfan nesaf ger archfarchnad Morrison. Dilynwch y cyfarwyddiadau i'r de, o gylchfan y garej Skoda, o hynny ymlaen.

Parcio
Mae llefydd parcio i ymwelwyr ar gael ar dir y Castell. Mae system drwyddedau'n weithredol yno. Gellir cael y trwyddedau hyn gan unrhyw aelod o staff wrth gyrraedd yr Archifdy ac arwyddo. Ni chodir tâl am barcio.

Ar y Bws/Trên
Mae'r orsaf drenau tua 15 munud o daith cerdded i ffwrdd, gan gynnwys cerdded i fyny bryn serth. Mae'r orsaf fysus tua 10 munud o daith cerdded i ffwrdd, ac mae hefyd yn cynnwys cerdded i fyny bryn serth. Mae yna safleoedd tacsis ger y ddwy orsaf.

Dod o hyd i ni ar fap Google

Cynnwys yr Archif

Mae gan Archifdy Sir Penfro amrywiaeth o ffynonellau hanesyddol, gan gynnwys dogfennau, mapiau, cynlluniau, ffotograffau, gweithredoedd, papurau newydd a recordiadau ffilm a sain sy'n ymwneud â sawl agwedd o hanes Sir Benfro. Mae'n dal cofnodion ei rhiant-awdurdod a'r awdurdodau a oedd yn ei rhagflaenu, cofnodion busnesau lleol a theuluol, cofnodion cymdeithasau lleol, cofnodion eglwysi a chapeli, cofnodion ystadau â thir a chofnodion ysgolion.
 

Oriau Agor

Dydd Llun - Dydd Iau 9am - 4.45pm (10am - 4.45pm ar ddydd Llun cyntaf y mis)
Dydd Gwener 9am - 4.15pm
Dydd Sadwrn cyntaf y mis (heblaw am benwythnosau Gŵyl y Banc) 9.30am - 12.30pm
Dosberthir y dogfennau olaf 15 munud cyn cau.

 

Hygyrchedd

Mae yna lefydd parcio dynodedig ar gyfer ymwelwyr anabl â'r Archifdy ac mae'r brif ystafell chwilio'n hygyrch i gadeiriau olwyn. Mae dolen sain gludadwy ar gael. Gellir benthyg chwyddwydrau o'r ddesg ymholiadau ac mae tŷ bach i bobl anabl wedi ei leoli oddi ar gyntedd y brif fynedfa i'r ystafell chwilio. Mae taflenni gwybodaeth ar gael mewn print arferol ac mewn print bras.
 

Cyfleusterau

Bwyd: Gwasanaethir Hwlffordd gan nifer o gaffis a thai bwyta lleol, a gellir cerdded yn rhwydd at lawer ohonynt.
Tai Bach: Mae tai bach cyhoeddus ar gael, gan gynnwys tŷ bach i bobl anabl.
Siop: Mae'r Archifdy'n gwerthu nifer cyfyngedig o lyfrau ar hanes teulu a hanes lleol gan awduron lleol, yn ogystal â chyhoeddiadau mewnol ar hanes lleol a sut i olrhain eich hanes teulu.
 

Apwyntiadau

Nid oes rhaid gwneud apwyntiad cyn ymweld â'r Archifdy, ond mae'r ystafell chwilio'n mynd yn brysur iawn ar adegau. Gallwch neilltuo darllenydd microffilm/fiche o flaen llaw er mwyn osgoi cael eich siomi.
 

Tocynnau Darllen

Nid oes rhaid cael tocyn darllen ar hyn o bryd. Fodd bynnag, mae disgwyl i chi lofnodi'r llyfr cofrestru ar bob ymweliad a chytuno i ddilyn rheolau'r ystafell chwilio.
 

Cypyrddau clo

Mae cypyrddau clo ar gael o fewn golwg y brif ystafell chwilio. Nid oes angen arian arnynt.
 

Defnyddio camerâu a chopïo

Mae'r Archifdy'n gweithredu polisi copïo ond gall staff ddarparu llungopïau yn unol â chanllawiau hawlfraint ac ar yr amod na fydd hyn yn niweidio'r ddogfen. Gellir defnyddio camerâu er mwyn tynnu lluniau o ddogfennau, hefyd, gan ddilyn yr un canllawiau. Codir tâl am rai o'r gwasanaethau hyn.
 

Defnyddio gliniaduron

Caniateir defnyddio gliniaduron personol yn yr ystafell chwilio. Byddai'n well gennym petaech yn defnyddio batri ar gyfer y rhain gan mai nifer cyfyngedig o socedi pŵer sydd ar gael.
 

Gwasanaeth Ymchwil

Mae yna wasanaeth ymchwil ar gael ar gyfer y rheiny nad sy'n medru ymweld â'r Archifdy. Codir tâl o £15 yr awr (£7.50 am chwiliadau byr o hanner awr). Dylid gwneud ceisiadau am ymchwil yn ysgrifenedig (naill ai mewn llythyr neu trwy e-bost), gan gynnwys tâl am awr gychwynnol o waith ymchwilio. Dylid gwneud sieciau'n daladwy i "Gyngor Sir Benfro".
 

Plant a phobl ifanc

Nid oes terfyn oedran isaf ar gyfer defnyddio'r cyfleuserau hyn.